ఇనాయకుడికేంది...ఈపుగాలేదేంది అని ఇకిలించేస్తా వుండారా?? ఈయమ్మి సమచ్చరానికోసారి వొచ్చి ఏదోటి వాగతావుంటాదని ఎక్కిరించేద్దారని అనుకునేస్తావుండారా? నేంజెప్పేది లాస్టుదాకా ఇని అప్పుడు జెప్పండి.
మీకో రెండు ఇసయాలు జెప్తా..ఇనండి.
వాన్లు సరిగ్గే వొస్తే ఇనాయకుడి పండక్కంతా పైర్లు నాటుకోను కస్టం లేకుండా వూర్లల్లో నీల్లుండాల.
మావూర్లో ఐతే ఇనాయకుడి పండక్కి మనకి తాగేదానికి నీల్లున్నా ల్యాకున్నా దేముడికి మాత్రం నూటెనిమిది బిందిలు నీల్లుబొయ్యాల. సిన్నంగా వుండే మొగపిల్లోన్ని యెతికిబట్టుకోని, వోడికో తుండుగుడ్డగట్టి, ముందు వోడికి నీల్లుబోసి, గుడికాడికి తొడకస్తారు. ఆడికొచ్చినంక ఆ వుండే తుండుగుడ్డ గూడా ఇప్పేసి చిన్న శెమ్మొకటి ఇచ్చి దేవుడి నెత్తిన అదేపనిగా నూటెమ్మిది బిందిలు నీల్లుబోయిస్తారు.
వూర్లో వుండే ఇండ్లోల్లు నాకొడుకుతొ పోయిచ్చండి అంటే నాకొడుకుతో పోయిచ్చండని కొట్లాడుకుంటా వుంటే చిన్న పిలకాయలు సిగ్గుతో సచ్చిపోయేవోల్లు. సిగ్గుతో సస్తా నీల్లుపోస్తా వుంటే " పెద్దమొగోడీడు..మూస్కొని పొయ్యివయ్ " అని పెద్దోల్లంతా తిట్టేవోల్లు.
అట్ట వొగపక్క నీల్లుబోస్తావుంటే ఇంగోపక్క భోరుమని వాన కురిసిపొయ్యేటిది.
ఇప్పుడా..వూర్లల్లో పిలకాయలే లేరు..ఇద్దురో ముగ్గురో వున్యా గుడ్లేసుకోనే పుట్నెట్టు వొంటిమింద శొక్కాయి తీరు. ఇంగేడొస్తాయి...దెస్టబట్నె వాన్లు. వానాలే...వంకాలే. అద్దోఇద్దోరని మొబ్బేసుకోని వుంటాయిగానీ...వొచ్చేదీలే...సచ్చేదీలే.
నేను సిన్నప్పుడు నీల్లుబోస్తే వానొచ్చేది. అదే మాయవ్వ చిన్నప్పుడు ఏంజేసినారో తెలుసునా?
నాకు మాయవ్వ జెప్తావుంటే ఒకటేనవ్వు. దేవుడికి వుండీలో దుడ్డేసి, పొంగిలిబెట్టి వాన్లు గావాలని మొక్కుంటే ఏం లాబంల్యా. అందుకే మా తాతోల్లు ఇనాయకుడి పండగజేసి, మూడ్రోజులు పూజ్జేసి, కుడుములుబెట్టి బొమ్మను జల్దిలోగలిపేదానికి చెరువుకాడికి బొయ్యేదంట.
ఆడ కర్పూరం ఎలిగిచ్చేసి, ఎర్నీల్లు దీసేసి పూజి ముగించేసేదంట. దేవుడ్ని సల్లగా నీల్లల్లోబెడ్తే ఆయినికి సేద్యంజేసేవోల్ల నొప్పిదెలీదని చెర్లో నీల్లుంటేగూడా, వొడ్న బెట్టేసి సక్కా వొచ్చేసేవోల్లంట. వొకట్రెండు దినాలు నొప్పి బిగపడ్తే కూడా, ఎండకు ఈపుగాల్తా వుంటే అల్లాడిపోయేవొడంట ఇనాయకుడు.
మూడోదినం ఎండొచ్చేప్పటికి మొబ్బులేసుకునేవంట. చెర్లో ఇనాయకుడి బొమ్మ కరిగేదాకా వొకటే వాన కురిశేదంట. ...వొద్దుసామీ వొద్దనేదాకా, వొంకలొచ్చేదాకా, నీల్లల్లో నానీ నానీ కాల్లకు అడుసుపుండ్లొచ్చేదాకా....కురస్తానే వుండేదంట.
అట్టని ఇనాయకుడంటే మావూరోల్లకు ఆయనంటే ఇస్టం లేదనుకునేరు. ఆడ ఇంటికో ఇనాయకి వుంది. మొగపిల్లోడైతే ఇగ్నేస్పర, ఆడబిడ్డైతే ఇనాయకి అని పిల్సుకుంటారు.
ఇదేంటికి జెప్తా వుండానంటే ... ఇప్పుడెట్టా యాడా నీల్లులేవు. అడుగో బొడుగో ఉండే నీల్లల్లో ఇనాయకుడి బొమ్మలు ఏసేసి, ఆ వుండే సుక్కా పాడుజేసుకోకుండా మనందరం వొక పెమాణం జేసుకుందారి. బొమ్మలన్నీ ఎత్తకపొయ్యి ఎండలోబెట్టేద్దారి. అన్ని ఇనాయకుల్లకి ఈపుగాల్తే వానరాకుండా యాడికిబొతాదో సూద్దారి. ...సరేనా???
